Զինեալ Յարձակում` Պոլսոյ հայոց Պատրիարքարանի Մայր Եկեղեցւոյ Վրայ` Պատարագի Ժամանակ
Այսօր առաւօտեան զինուած յարձակում եղած է Պոլսոյ հայոց պատրիարքարանի` Գում Գափու թաղամասի
մէջ գտնուող մայր եկեղեցւոյ վրայ: Յարձակումը իրականացուած է առաւօտեան պատարագի ժամանակ: Ինչպէս
կը հաղորդէ Akunq.net-ը` վկայակոչելով թրքական Ratikal պարբերականը, այս առաւօտ` ժամը
12:30-ի կողմերը, անյայտ անձ մը պատարագի ժամանակ 7 անգամ օդ կրակելէն ետք փախած է դէպքի
վայրէն: Աղբիւրի համաձայն ականատես` պոլսահայ համայնքի ճանչցուած ներկայացուցիչ Կարօ
Պալեան, կիրակնօրեայ պատարագի աւարտին եկեղեցիին մօտեցած անձ մը օդ կրակելէն ետք ճողոպրած
է դէպքի վայրէն: Խուճապ սկսած է պատարագին մասնակցող պոլսահայերու մէջ, այնտեղ կային
նաեւ երեխաներ: Յարձակման հետեւանքով, բարեբախտաբար, որեւէ մէկը չէ տուժած: Պալեան
մասնաւորապէս նշած է. «անձ մը ժամը 12:30-ի կողմերուն մօտեցած է պատրիարքարանի դրան եւ
ատրճանակով 7 անգամ օդ կրակած: Ներկայ պահուն կը փորձեն կազմել անոր պատկերը: Ահաբեկչութեան
դէմ պայքարի եւ անվտանգութեան մասնաճիւղերը միասին կ’աշխատին` դէպքը հետաքննելու ուղղութեամբ:
Հնարաւոր է նաեւ, որ տուեալ անձը մինակ չէ եղած: Դրան մօտ ոչ ոք չէ եղած` մեզմէ բացի:
Յարձակողը որեւէ բան չէ բղաւած եւ ոչ մէկ կարգախօս չէ հնչեցուցած: Եկեղեցւոյ մէջ խուճապ
սկսած է: Դռները փակած ու միջոցներ ձեռնարկած: Աղբիւրի փոխանցմամբ` յարձակումէն ետք
մեծ թիւով ոստիկաններ հասած են դէպքի վայր: Յիշեցնենք, որ բոլորովին վերջերս` սոյն
թուականի Ապրիլ 27-ին, 30-40 հոգինոց խումբ մը ցերեկուայ ժամերուն յարձակած էր Աթաշեհիրի
Նոր յոյս եկեղեցւոյ վրայ: Եւս մէկ յարձակում եղած էր Պուրկազ կղզում գտնուող Այոիս Իոնիս
յոյն ուղղափառ եկեղեցւոյ վրայ: